Óhætt er að fullyrða að jólaverslunin í tískuhúsunum í París er ekki alveg eins og venjulega í ár frekar en verslunin almennt í vetur síðan fjármálakreppan hóf að ríða húsum. Sumir eiga ekki við lausafjárvanda að stríða og láta sér ekki muna um að skreppa til Parísar og kaupa  kjóla fyrir nokkrar milljónir króna. Til dæmis hef ég til sölu kjóla um þessar mundir á um þrjú til níuþúsund evrur sem er álíka mikið og ódýrir bílar kosta hér. En það er af sem áður var og sífellt fleiri sem velta vöngum yfir verðinu áður en út í slík kjólaævintýri er farið og nú spyrja svartklæddu konurnar frá austurlöndum hvort þær geti fengið afslátt og taka fram vasatölvur. Rússarnir eru sömuleiðis heldur færri en oft áður þó suma dagana bjargi þeir búðunum frá hinu skammarlega núlli, þegar ekkert selst heilan dag og andlegt heilsa starfsfólksins er í hættu.

Frakkar eru frekar daufir í bragði um þessar mundir og helst að almenningur muni gleðja þá yngstu um þessi jól, meðal annars með því að sleppa þeim fullorðnu. Aðrir leita í ódýrari merki sem oft geta verið þægileg leið til að gleðja þá nánustu án þess að tæma algjörlega  peningaveskið.

Á þessum árstíma er það Siglingarlínan svokallaða (croisière) sem í tískuhúsum boðar vorið líkt og sumartísku um hávetur, í upphafi ætluð þeim sem fóru í skemmtisiglingar yfir veturinn. Viðskiptavinirnir eru hins vegar frekar uppteknari af einkaútsölum sem standa yfir og eru reyndar kolólöglegar. Þá bjóða tískuhúsin viðskiptavinum sínum að versla á útsöluverði án undan öðrum en útsölur hefjast snemma í janúar. Þessar einkaútsölur hafa reyndar aldrei byrjað eins snemma því fjármálakreppann barði allharkalega að dyrum þegar að vetrartískan átti einmitt að seljast sem best. Þess vegna sefur hún værum svefni baksviðs í tískuhúsunum og í geymslum stórverslanna og bíður útsöluveislunnar sem reyndar verður kannski ekki nein veisla þetta árið, svo lítill er áhuga viðskiptavina.

Svo til að kóróna allt saman í þessari viku fannst sprengjuefni í einu af stóru magasínunum í París, Printemps Haussmann (á hæðinni þar sem ég vinn) sem varð til þess að stórversluninni var lokað í nokkra tíma á þriðjudag og varð fyrir vikið uppspretta að ótta við hryðjuverk í miðri jólaversluninni. Jólin 2008 verða því ekki kölluð kaupmannajól hér í París frekar en  víða annars staðar. Ekki er bjartara framundan þar sem sérfræðingar spá samdrætti í lúxusgeiranum á nýju ári, í fyrsta skipti í ára raðir.

Ég óska lesendum og landsmönnum öllum gleði og friðar á jólum.

Fyrir nokkru sendi Ágúst nokkur athugasemd við pistil á blogginu mínu sem hét Fjör í Frans. Hann segir réttilega að framhaldið hafi vantað og að Sarkozy hafi á endanum haft betur og komið stjórnarskrárbreytingunum í gegn. Ég hef lengi ætlað að skrifa framhaldið og svara Ágústi en ekki gefið mér tíma fyrr en nú.

Það er vissulega rétt að franski Sósíalistaflokkurinn er gamaldags og á í miklum erfiðleikum sem ekki sér fyrr endann á og ekki endilega líklegt að sá flokksformaður sem verður valinn í nóvember muni breyta miklu, svo djúpstæður er ágreiningurinn í flokknum. Til dæmis verði það borgarstjóri Parísar Bertrand Delanöe sem tekur við er hann af sumum sagður framhald af kyrrstæðunni þar sem hann er úr hópi sem hér er kallaður ,,hinir fjórir úr 18e hverfi” eins og Lionel Jospin fyrrum forsætisráðherra sem komst ekki einu sinni í aðra umferð forsetakosninganna 2002. Hollande sem hefur stjórnað flokknum í ellefu ár er einmitt sakaður um að hafa ekki tekið til í flokknum eftir 2002 og því var flokkurinn ófær um að sigra í  kosningunum 2007. Nú er Hollande sagður vera að semja við borgarstjórann um að styðja hann og illar raddir segja að það sé sönnun þess að ekkert muni breytast verða þetta niðurstaðan.

Það var einmitt François Hollande ásamt öðrum sem ákvað að semja ekki við Sarkozy um umbætur á stjórnarskránni meðal annars að setja hömlur á þann tíma sem forsetinn fær í sjónvarpi og ætluðu sér að reyna að koma í veg fyrir að stjórnarskrárbreytingarnar færu í gegn. Hann hefur reyndar veikt stöðu sína fyrir vikið og þrátt fyrir að allir hafa beygt sig fyrir flokkshollustunni fyrir utan Jack Lang sem studdi frumvarpið, og að upplegg hans í málinu hafi verið rangt eins og Ágúst sagði réttilega ,,Sósíalistaflokkurinn er alltaf á móti öllu”. (Reyndar hefði frumvarpið farið í gegn á einu atkvæði án Jack Lang.)

Í stjórnarskráfrumvarpinu eru vissulega áhugarverðar umbætur. Til dæmis sú að fjórar milljónri manna geti krafist þjóðaratkvæðagreiðslu um tiltekið mál sem hlýtur að teljast mjög nútímalegt í lýðræðisþjóðfélagi. Það er einmitt líklegt að það verði franski pósturinn sem brjóti blað og endi í þjóðaratkvæðagreislu því ríkisstjórnin vill einkavæða hann að hluta sem þýðir svo yfirleitt hér að einkavæðingin er algjör nokkrum árum seinna eins og gerðist með símann. Nú rís upp alda mótmæla og undirskriftasöfnin er þegar hafin. Einnig munu nú  meirihluti og stjórnarandstaða koma sér saman um hluta af dagskrá þingsins en áður var það eingöngu á valdi ríkisstjórnarinnar.

Því miður lét forsetinn hins vegar undan sínum eigin flokki til að tryggja framgang frumvarpsins sem þvertók fyrir að breyta starfsháttum Öldungardeildarinnar frönsku en hún er einungis valin af borgar- og bæjarstjórnum sem og þingmönnum, hinir svokölluðu ,,upplýstu kjósendur”. Mikill meirihluti stærri borga og bæja er stjórnað að Sósíalistum sem og tuttugu af tuttugu og tveimur héraðstjórnunum. En þar sem að smábæjir sem eru margir í höndum hægrimanna hafa jafnmikið vægi og stærri borgir er næstum útilokað að meirihluti Öldungardeildarinnar breytist. Hún er því og verður til hægri og þannig geta hægrimenn alltaf komið í veg fyrir að ýmis mál komist í gegn sé þing og ríkisstjórn til vinstri.

Því verður að segjast eins og er að breytingarnar eru mun minni en í upphafi áttu að vera og stjórnarskrárbreytingarnar ansi vatnsþynntar í lokin. Það er engin bylting sem átt hefur sér stað í Frakklandi og í unnu allir afturhaldssinnar jafnt til hægri sem vinstri sigur í þessu máli.

Grein úr Allt Fréttablaðið

Fyrir ekki svo löngu var ekkert eins hallaærislegt og skorinn kristall, merki um gamaldags hugmyndir um skreytingar og helst á sótthreinsuðum heimilum forstjóra og útgerðarmanna. Eftir nokkurra ára eða áratugaútlegð er kristall í tísku á ný. Það þýðir þó ekki að kristalinn eigi að setja í öll horn og í allar hillur. Nú á hann að vera á stöku stað í bland við aðra muni. Stundum heyrist sagt að eitthvað sé svo hallærislegt að það verði flott. Spurning hvort þessi hugmynd búi að baki endurkomu kristalsins.

Einnig eru kristalsglös nú aftur uppi á borðum og þykja ómissandi á fallegu veisluborði. Áður fyrr þótti viðeigandi að öll glös væru eins, annað hvort í saman lit eða ólituð með sama munstri. Nýja línan er að blanda saman ólíkum litum til dæmis dökkrauðu, bláu og grænu eða þá að kaupa glös þar sem að hvert og eitt er með sitthverju laginu.

Í Evrópu eru í kristalslöndin eins og Pólland og Slóvenía gengin inn í Evrópusambandið og því er kristall á mun hagstæðara verði en áður.